Noticias

Actividades ambientais do Club Mauxo

Reconstrúen unha estalagmita nunha cova de Samos

Membros do club espeleolóxico vigués Maúxo levaron onte a cabo a segunda fase da restauración dunha estalagmita da Cova do Carballo, en Santalla de Lóuzara, que foi esnaquizada por persoas descoñecidas no 2006.

A primeira fase realizouse en setembro do pasado ano, cando os espeleólogos devolveron á súa localización orixinal un dos anacos nos que quedou partida esta formación calcárea. A nova operación consistiu en pegar outro pedazo, correspondente á parte superior de de a estalagmita.

A operación foi realizada cunha técnica non utilizada ata agora en España, pero que xa se experimentou amplamente noutros países, a base de resinas empregadas para reparar construcións de formigón.

Os autores da desfeita utillizaron no seu momento unha serra eléctrica radial para cortar esta estalagmita e outra que se atopaba na mesma zona da gruta, ambas de considerables dimensións. A outra estalagmita foi roubada e non volveu a saberse dela. A que restaura o club Maúxo non chegou a ser sacada da cova debido probablemente ao seu gran peso.

A gruta está actualmente protexida por unha reixa que foi instalada no 2007 pola asociación cultural Fonte dá Cova, constituída polos veciños da zona co obxectivo principal de defender esta paraxe natural. A reixa permite a entrada e a saída dos murciélagos dos que existe unha importante colonia na Cova do Carballo.

Fonte: La Voz de Galicia (Ed. Monforte)

Toma de mostras na gruta de Arcoia para estudar o clima prehistórico

Os espeleólogos do club Maúxo participarán hoxe nunha operación científica na cova de Arcoia, no Courel, que consiste en extraer mostras dunha estalagmita que serán utilizadas para estudar o clima prehistórico. O traballo farase en colaboración cos investigadores do Instituto de Xeoloxía da Universidade da Coruña, que leva a cabo este estudo.

Recentemente, os científicos desta institución conseguiron reconstruír unha secuencia completa da evolución do clima na serra nos últimos 14.000 anos estudando fragmentos dunha estalagmita desta mesma cova. O método consiste en analizar os minerais radiacticvos, os isótopos de osíxeno e carbono e os poles encerrados nestas formacións de roca calcaria.

Agora preténdese utilizar unha estalagmita máis antiga para extraer datos sobre o clima que reinaba na zona na última glaciación. En caso de obter unhas mostras adecuadas, os investigadores esperan poder remontarse ata os inicios do período glacial, fai uns 100.000 anos.

Fonte: La Voz de Galicia (Ed. Monforte)